ساره انا مش مستحمله يطلعني شيطانه كده لمجرد اني بطلب حقي فاني مش مسامحه اخته علي اللي عملته ومش عاوزه اتعامل معاها تاني وزهقت من نغمه كلنا بنغلط ولازم نرجع هو اصلا موقفش جمبي ولا جاب لي حقي منها
-عرفتي ازاي انه شايفك شيطانه ؟
-كل شويه يقعد يقولي انه اتصدم فيا وكان فاكرني طيبه وان الموقف ده بين حقيقتي
-يقصد ايه بحقيقتك ؟
-اني مش متسامحه ومش طيبه لمجرد موقف باخد حقي فيه
-طيب كان نفسك يشوفك ازاي ؟
-كان نفسي يشوفني متسامحه وطيبه بس حقي مسامحش غير لما حقي يرجع
-وده كان هيفرق معاكي في ايه ؟
-كنت هحس انه واقف جمبي مش ضدي
-وده كان هيفرق معاكي في ايه ؟
-كنت هحس انه حاسس بيا وفاهمني
-وده كان هيفرق معاكي في ايه
-النار اللي جوايا دي كانت هتهدي
-ولو النار اللي جواكي هديت كان هيحصل ايه ؟
-مكنتش هولع الدنيا كده انا بهدلت الدنيا وزعقت وضيعت حقي
-فكنتي عايزه تعملي ايه بدل كده ؟
-ابقي هاديه واعرف اقول راي بهدوء
-ووقتها كان هيحصل ايه ؟
-هاخد حقي
-شكله ايه حقك ده ؟
-شكله ان الناس تشوفني صح وتشوفها هي غلط
-وده كان هيفرق معاكي في ايه ؟
-كنت هحس اني مع ناس حقانيه مش ناس ظالمه
-ولو بقيتي مع ناس حقانيه كان ايه اللي هيحصل ؟
-هبقي مطمنه اني مش هتظلم
-وايه اللي انت متخيله انه هيحصلك لو اتظلمتي ؟
-هتوجع
-وايه كمان
-هبقي منبوذه عشان هيشوفوني ست مش كويسه
-ده حصلك قبل كده ؟
-اه اااااه كتير اوي اوي لما بيحصل موقف انا مظلومه فيه وبروح اجيب حقي الناس بتتهرب مني وفي الاخر الاقيهم واقفين مع اللي ظلمني وعرف يكسبهم وانا اللي قاعده بقهرتي لوحدي
-هل في موقف قبل كده حصل في حاجه تانيه ؟
-اه اوقات لما ببقي مع اصحابي واهلي اللي انا قريبه منهم بينصفوني بصراحه
-وده علمك ايه ؟
-ان اوقات بتنصف واوقات لا
-وده سببه ايه ؟
-اني مش بعرف اخد حقي ؟
-طيب لو كنت انت السبب الوحيد تفسري بايه انك اوقات بتتنصفي وانت نفس الانسانه
-يمكن اوقات مش بيكون معايا الحق
-او ؟
-او هما اصلا ناس سلبيه مش منصفه وبتشترى دماغها
-او ؟
-او احيانا من كتر انفعالي بيخافوا الموضوع يكبر فبيسكتوني وخلاص
-او ؟
-او ان ليهم مصلحه مع الطرف التاني مش عايزيين يضيعوها
-او ؟
كفايه 😊
انا فهمت يا ساره هو انا ليه كنت محمله نفسي مسئوليه الفشل اوي كده ؟
-هو ده في الموضوع ده بس ولا في مواضيع تانيه ؟
-لا انا بعمل كده كتير اوي اي موقف يحصل فيه فشل او خطأ افضل افكر انا غلطت في ايه واعمل ايه واتصرف ازاي اكن الخناقه دي انا الطرف الوحيد فيها
-احيانا بنفكر كده اننا السبب وبيبقي عندنا صعوبه اننا نشوف اسباب تانيه للمشكله وبعد شويه ممكن برضه نشوف الطرف التاني هو السبب دايره من اللوم للذات والغير وبنحط علي نفسنا وجع فوق وجع حزننا علي اللي حصل
ووجع خوفنا من اللي جاي
ووجع حيرتنا هنعمل ايه
رفقا بالطفل الذي يتألم بداخلك 💔💔
ويبقي الاثر
#ويبقي_الاثر
إرسال تعليق