في العلاقه بينكم احيانا بيكون في طرف (زوج او زوجه ) بينفعل ويقفش اكتر من التاني اللي ممكن يكون بيتعامل بهدوء ومرونه اكتر
اوقات ده بيعمل حمل غير عادي لما بتتكلموا مع بعض
الشخص اللي بينفعل بيتغاظ جدا من هدوء الطرف التاني وبيعتبره برود وتناحه وتكبير دماغ من غير ما يبص انه برضه بيديله مساحه انه يعبر وان هدوئه ده بيحمي المواقف من التصعيد المحتمل لو الطرفين كانوا بينفعلوا جامد
والطرف الهادي بيضغط جدا من ردود افعال الشخص اللي بينفعل وبيحس انه مش بيتسمع ولا بيتفهم وان الطرف التاني بيعمل كل حاجه بسرعه
بيزعل قبل ما الاول يخلص كلامه
بيزهق قبل ما يوصلوا للموضوع المهم
بيتحمق قبل ما يفهم وجهه النظر
بيصعد الامور بدون ما يكون الموضوع مستاهل
من غير ما يقدر ان الطرف ده واضح جدا وبيقول كل اللي عنده بسرعه وبيحرك الدنيا للاحسن وينجز اكتر لانه مش بيستحمل الحال المايل كتير فده بيدي انجاز وبيسرع الحياه
مفيش صح وغلط يا جماعه
ممكن تنجح في مواقف بسبب انك بتتحمق وتقفش
وممكن مواقف تانيه تنجح فيها بسبب صبرك وهدوئك
حصر البني ادميين صح وغلط وانتقادنا لصفات بعض ولومنا لبعض عليها ده من اكتر الحاجات اللي بتحرمنا من التكامل والتعاون مع بعض
وبتخلي كل طرف يتمسك اكتر من اللازم من الطبع الاسهل عليه ويرفض انه يروح ناحيه الهدوء اللي بيتلام ويتأذي نفسيا بسببه وبيدخل في مود مقاوحه ورفض وكره للطبع ده
اللي بالمناسبه هو يقدر يكتسبه ويستخدمه وقت ما يحتاج مش لازم يتحول لشخص هادي لاننا محتاجين جدا لحمقته وحزمه بجد
او ان الهادي اللي بيتهم بالبرود والتناحه يرفض تماما ويكره انه يقفش ويغضب ويبقي حاسم لما الموقف يتطلب ده
عارفيين فريق الكوره اللي كله مهاجمين بس ومحدش راضي يدافع عن الجون هيخسر الماتش زيه بالظبط زي الفريق اللي كله مدافعين ومحدش بيهاجم ويدخل اجوان
لو ربنا رزقكم بفريق متكامل افرحوا وحاولوا تعملوا خطه لمصلحه كل الفريق
حطوا كل لعيب في مكانه ومن وقت للتاني دربوا اللعيبه وخلوها تكسب مهارات تخليها تلعب احسن وتحت ظروف هي مش متعوده عليها
وفي يوم من الايام الهادي هيتعلم يقفش ويحتد لما الموقف يستاهل
والactive هيتعلم يصبر لما الموقف يستاهل
والاهم من ده كله ان كل واحد فيكم هيحس ان التاني دخل حياته عشان يطورها وان بسببه هو راح لمنطقه مكنش متصور انه يوصل ليها منطقه اتزان ❤❤
رزقنا الله واياكم اتزان ❤
ويبقي الاثر
إرسال تعليق